TUNGKOL SA KAMATAYAN

PAGPANAW,PAGKAWALA, KATAPUSAN. Huling Sandali. Anuman ang itawag sa kamatayan ay hindi nababago ang katotohanang ito ay dumarating sa buhay ng tao sa mundo. Sa itinakdang panahon,hindi ito maiiwasan matatakasan ninuman, MATANDA, BATA, MAYAMAN O MAHIRAP, LALAKE O BABAE. Maari tayong pumanaw dahil sa karamdaman,aksidente, o kalamidad sa daigdig. Hindi tayo imortal.

Ngunit, pagkatapos ng kamatayan ay ano ang mangyayari sa tao? Saan siya patutungo pagkatapos mapugto ang kanyang hininga? At may magagawa ba ang mga naulila na maaring mapakinabangan ng mga yumao?

Ang Biblia ay may itinuturo tungkol sa kamatayan, buhay pagkatapos ng kamatayan at iba pang isyu na nakapaloob dito.


ANG KARUPUKAN NG BUHAY



Tiniyak ng Biblia ang karupukan ng buhay ng tao:


Santiago 4:14
" Kayo ngang hindi nakaaalam ng mangyayari bukas. Ano ang inyong buhay? Kayo nga'y isang singaw na sa sangdaling panahon ay lumilitaw, at pagdaka'y napapawi. "



Maging si apostol Pablo ay ipinaliwanag kung paanong ang kamatayan ay nagudulot ng panganib sa ating buhay:



"Araw-araw ay nabibingit ako sa kamatayan, mga kapatid ... At kami, bakit namin isinasapanganib pa ang buhay namin oras-oras? " 1 Cor.15:31, 30, NPV



Gusto man ng taong pigilin ang kamatayan, siya ay walang kapangyarihan dito (Ecles. 8:8). Hindi maikakaila na walang pinipili ang kamatayan. Ito ay darating saanman at kailanman; madalas ay bigla, masakit at di-inaasahan. At bagaman marami at iba't iba ang paniniwala patungkol sa mangyayari sa tao kapag siya ay namatay, ganito naman ang sinasabi ng biblia:



Ecles. 10:14 MBB
" Ang mangmang ay walang tigil sa pagyayabang. Ngunit sinong makakapagsabi ng susunod na pangyayari at ng magaganap kapag siya ay patay na? "



Kaya ang Dios ang dapat nating paniwalaan tungkol sa mangyayari sa tao kapag siy ay namatay.


BUMABALIK SA ALABOK


Tiniyak din ng Biblia, kung saan nakasulat ang mga salita ng Dios, ang mangyayari sa espiritu, kaluluwa, at katawan na bumubuo sa tao ( 1 Tes. 5:23). Ang kaniyang pisikal na katawan ay nagbabalik sa alabok kung saan ito nagmula:


" Sa pawis ng noo mo manggaling ang iyong kakanin hanggang sa magbalik ka sa lupa, pagkat sa lupa ka kinuha; ikaw ay alabok at sa alabok ka rin babalik " Genesis 3:9, NPV



Ang espirito naman ng tao kapag siya ay namatay ay bumabalik sa Dios na nagbigay nito (Ecles. 12:7, MB). At kapag namatay ang tao ay namamatay din ang kaniyang kaluluwa; hindi rin ito imortal (Ezek. 18:4). Ito ang dahilan kaya ang paniniwala na ang kaluluwa ng taong namatay ay pupunta sa isa satlong istasyon :

LANGIT( kung banal)
IMPIYERNO(kung mkasalanan)
PURGATORYO( kung hindi pa nalilinis na lubos sa kasalanan

Ito ay hindi ayon sa mga aral ng Dios na nakasulat sa Biblia. Wala ring banggit ang Biblia tungkol sa purgatoryo.


Sa ibang banggit ng Biblia, ang mga patay ay nakahiga sa mga libingan at natutulog lamang (Awit 88:5; Lucas 8:52). Ito ay mananatili sa libingan at "DI NA BABANGON; HANGGANG MAWALA ANG KALANGITAN"





Job 14:10-12
''Ngunit namamatay ang tao; siya'y ililibing, mapapatid ang kaniyang hininga at wala nang kasunod. Kung paanong ang tubig ay nawawala sa dagat o ang isang ilog ay natutuyo, gayon ang tao, nahihiga at di nagbabangon; HANGGANG SA MAWALA ANG KALANGITAN, ang tao'y di na gigising o mangangamba pa sa kaniyang pagtulog. '(NIV,NPV)



Mawawala ang langit ma siyang panahon ng pagbangon ng mga patay sa Araw ng Paghuhukom( 2Pedro 3:10,12).


Kaya hindi sinasang-ayunan ng Biblia ang paniniwala na pagkamatay na pagkamatay ng tao ay agad siyang haharap sa hukuman ng Dios. Ang kagantihan ay sa pagparito pa ng Panginoong Jesucristo o sa araw ng Paghuhukom--hindi kaagad-agad. (Mat. 25:31-34,41)


ANG PAGDARASAL PATUNGKOL SA PATAY

Ang pagdaradal patungkol sa patay ay kadalasang ginagawa ng kanilang mga mahal sa buhay at kaibigan. Subalit ito kaya ay ayun sa Biblia? Ganito ang nakasulat tungkol sa kalagayan ng mga patay:

Awit 146:4
" Ang hininga niya ay pumapanaw, siya'y nanunumbalik sa kaniyang pagkalupa; sa araw ding yaon ay mawawala ang kaniyang pagiisip. "



Ecles. 9:5-6
" Sapagka't nalalaman ng mga buhay, na sila'y mangamamatay: nguni't hindi nalalaman ng patay ang anomang bagay ni mayroon pa man silang kagantihan; sapagka't ang alaala sa kanila ay nakalimutan.
Maging ang kanilang pagibig, gaya ng kanilang pagtatanim at ng kanilang pananaghili ay nawala ngayon; na wala man silang anomang bahagi pa na magpakailan man sa anomang bagay na nagawa sa ilalim ng araw. "



Samakatuwid, walang mapapakinabang ang mga patay sa anumang ginagawa ng buhay sapagkat wala na silang malay o pag-iisip. Gaano man kataimtim karami, at kadalas ang pagdarasal ng mga naulila ay hindi ito pakikinabangan ng yumao. Hindi nila nalalaman ang anuman bagay at wala silang anomang bahagi sa anomang bagay na ginagawa para sa kanila; kaya, hindi sila dapat dalanginan o tawagan. Ito ang dahilan kaya walang pagdasal na isinasagawa ang mga kaanib sa Iglesia Ni Cristo para sa pumanaw na mahal nila sa buhay. Labag din sa aral ng Biblia ang paniniwala na ang patay ay nagpapakita, nakakausap, at nagpaparamdan (Gen.3:19; Ecles. 3:19-20).



ANG DAPAT GAWIN BAGO ANG KAMATAYAN

Dahil maglalaho ang hininga, mahalagang matupad ng tao ang layunin ng Dios sa pagbibigay sa kaniya ng buhay:



Ecles. 12:13 "...Matakot ka sa Diyos at sundin mo ang kanyang mga utos pagkat ito ang buong katungkulan ng tao. " [MB]


Hindi dapat gugulin ng tao ang panahon sa mga bagay na walang kabuluhan----Sa kalayawan, makasariling pangarap at ambisyon, at mga bagay na panlupa lamang. Na kapag kumupas na ang lakad at mapagod na sa paglipas ng panahon ay saka lamang magugunita ng iba na bumaling sa Dios at maglingkod sa Kaniya---- isang bagay na dapat ay ginawa nila nang mas maaga. Maliwanag ang itinuturo ng Banal na Kasulatan:




" Alalahanin mo ang lumikha sa iyo sa panahon ng iyong kabataan bago dumating ang mga araw at taon na puno ng kaguluhan panahong hindi mo na madama ang tamis mg mabuhay. Alalahanin mo ang Diyos bago magkubli ang sikat ng araw, bago magdilim ang buwan at mga bituin, bago ka lambungan ng makapal at madilim na ulap. Alalahanin mo siya bago manghina ang iyong katawan, bago manghina ang iyong bisig, bago mawala ang lakas ng iyong tuhod. Alalahanin mo siya bago mabungi ang iyong mga ngipin at bago lumabo ang iyong mga mata. Alalahanin mo nga siya bago ka mawalan ng pandinig, na halos di mo marinig ang ingay ng gilingan, ang huni ng mga ibon at ang himig ng awitin. Alalahanin mo siya bago dumating ang panahon na katakutan mong umakyat sa itaas, bago dumating ang panahon na hindi kana makalakad na mag-isa, bago pumuti ang iyong buhok, at lipasan ng pagnanasang sumiping sa minimahal....." [Ecles. 12:1-5, Ibid]



Magiging huli na ang lahat upang matupad ng tao ang layunin ng pahgkakalalang sa kaniya---na ito ang maglingkod sa Maylalang----kapag napugto na ang kaniyang hininga. Sa harap ng katotohanang ito ay ganito ang paalala ng Biblia:


Ecles.12:7
" Alalahanin mo siya bago manumbalik sa alabok ang ating katawang lupa at ang ating hininga ay magbalik sa Diyos na may bigay nito." [MBB]



NAPAGTAGUMPAYAN ANG KAMATAYAN


Sa malao't madali ang tao ay papanaw sa iba't ibang kaparaanan o kadahilanan. Subalit may pahayag ang Panginoong Jesucristo tungkol sa Iglesia na Kaniyang itinayo:


Mateo 16:18
" At sinasabi ko sa iyo, ikaw ay Pedro, at sa ibabaw ng batong ito ay itatayo ko ang aking iglesya, at hindi makapananaig sa kanya kahit ang kapangyarihan ng kamatayan. "[MB]




Ang kaanib sa Iglesiang ito----na tinawag na Iglesia ni Cristo (Gawa 20:28, salin ni lamsa)-ay ginagarantiyahan ni Cristo na hindi pananaigan ng kamatayan. Hindi din ito nangangahulugan na hindi na sila mamamatay; papanaw din sila katulad ng kanilang kapuwa-tao. Subalit kung sila man ay mamatay, gayunman ay bubuhayin silang mag-uli sa Araw ng Paghuhukom, hindi upang hatulan, kundi upang magmana ng buhay na walang hanggan ( 1 Tes. 4:16-17; Apoc. 20:6).



Ang pagpanaw ng isang kaanib sa Iglesia ni Cristo ay pagtulog lamang, sapagkat pagdating ng takdang panahon, siya ay muling babangon o muling mabubuhay. Sa gayon mangyayari ang itinuro ni Apostol Pablo na napagtagumpayan ng mga kaanib sa Iglesia ni Cristo ang kamatayan:



1 Corinto 15:51-54
" Narito, sinasaysay ko sa inyo ang isang hiwaga: hindi tayong lahat ay mangatutulog, nguni't tayong lahat ay babaguhin,
Sa isang sangdali, sa isang kisap-mata, sa huling pagtunog ng pakakak: sapagka't tutunog ang pakakak, at ang mga patay ay mangabubuhay na maguli na walang kasiraan, at tayo'y babaguhin.
Sapagka't kinakailangan na itong may kasiraan ay magbihis ng walang kasiraan, at itong may kamatayan ay magbihis ng walang kamatayan.
Datapuwa't pagka itong may kasiraan ay mabihisan ng walang kasiraan, at itong may kamatayan ay mabihisan ng walang kamatayan, kung magkakagayon ay mangyayari ang wikang nasusulat, Nilamon ng pagtatagumpay ang kamatayan. "



SA DAKONG WALANG KAMATAYAN


Sumasampalataya tayong mga kaanib sa Iglesia ni Cristo sa katotohanang itinuturo ng Biblia tungkol sa mga mahal natin sa buhay na pinapagpahinga na ng Dios. Ang mga katotohanang ito ay dapat magbigay sa atin ng kaaliwan; ang kamatayan ay pansamantala lamang; ito ay hindi isang kalugihan sa ganang tunay na mga hinirang ng Dios.


Bagaman pinaghihiwalay ng kamatayan ang magkapamilya at magkakaibigan sa loob ng tunay na Iglesia at ito ay nagdudulot ng kalungkutan at mga pagluha, gayunman ang kaaliwan natin ay ang pag-asang magkikita tayong muli; pagdating ng takdang araw ay muling magsasama tayo sa piling ng Dios doon sa Kaniyang kaharian, sa Bayang Banal o sa Bagong Jerusalem, kung saan "HINDI NA MAGKAKAROON NG KAMATAYAN" (Apoc.21:4).


Ang pagluha at pagdadalamhati ay di natin mapigil sa pagpanaw ng ating minamahal. Subalit alam nating sa araw ng muling pagparito ni Cristo ang ating kalungkutan ay papalitan ng kagalakang hindi maagaw ninuman ( Juan 16:20, 22).

Ang Pangalan Ng Iglesia na Itinatag Ni Cristo

"Ang pangalan ay mahalaga"


Ito ang itinatawag at isa sa ikakakikilala ng isang tao, bagay, lugar,o organisasyon.


Nang lalangin ng Dios ang unang tao, siya ay binigyan Niya ng Pangalan-ADAN. Ang babae na ibinigay ng Dios na makasama ni Adan ay binigyan niya ng Pangalan---EVA. Ang mga hayop na nilalang ng Dios ay binigyan din ni adan ng mga Pangalan (Gen. 2:20).


Sa Biblia, malimit na ang Pangalan ay may kahulugan tulad ng pangalang Adan na ang kahulugan ay tao. Ang pangalang Eva ay nangangahulugang ina ng lahat ng nabubuhay (Gen.3:13). Matapos patayin ni Cain ang kanyang kapatid na si Abel, ang ipinanganak ni Eva ay pinangalanang Set na ang kahulugan ay ITINAKDA o KAHALILI. Naaangkop ang pangalang ito sapagkat si Set ang naging kahalili ni Abel. Iilan lamang ito sa mga halimbawa ng mga pangalang ibinigay na may kaugnayan sa mga pangyayari noong una.


ANG PANGALAN NG IGLESIANG ITINATAG NI CRISTO


Ang isa sa mga ikakikilala sa tunay na iglesia na itinatag ni Cristo ay ang pangalan. Ano ang pangalan ng Iglesiang itinatag ni Cristo at anu-ano ang ipinakikilala ng pangalang ito? Sa Roma 16:16 ay ganito ang nakasulat :



Roma 16:16
" Mangagbatian kayo ng banal na halik. Binabati kayo ng lahat ng mga iglesia ni Cristo. "

Sa Bagong Tipan, ang pangalang opisyal na itinawag sa Iglesiang itinatag ni Cristo ay Iglesia ni Cristo. Angkop na angkop ang pangalang ito sa pahayag ni Cristo:

"...itatayo ko ang aking iglesia "(Mat.16:18).

Ipinakilala ng Pangalang Iglesia ni Cristo ang pagmamay-ari ni Cristo sa Iglesia. Ipinakikilala rin nito ang pagkakaugnay ni Cristo at ng Iglesia:


" At siya ang ulo ng katawan, sa makatuwid baga'y ng iglesia." (Col.1:18)


Bukod sa mga nabanggit, ipinakikilala rin ng pangalang Iglesia ni Cristo ang kaugnayan nito sa kaligtasan:


Gawa 4:12
" At sa kanino mang iba ay walang kaligtasan: sapagka't walang ibang pangalan sa silong ng langit, na ibinigay sa mga tao, na sukat nating ikaligtas. "

Ang kaligtasan ay matatagpuan lamang sa pangalan ni Cristo. Marapat lamang, kung gayon, na ang Iglesia na itinatag Niya ay tawagin na sunod sa pangalang Cristo---Iglesia Ni Cristo---sapagkat ito ang ililigtas ni Cristo:


Efeso 5:23, MBB
" Sapagkat ang lalaki ang ulo ng kanyang asawa, tulad ni Cristo na siyang ulo ng iglesya, na kanyang katawan, at siyang Tagapagligtas nito. "

PATOTOO NG IBA'T IBANG RELIHIYON

Isang PARING JESUITA na si Francis B. Cassilly ay nagpapatotoo na ang itinatag ni Cristio ay tinawag na Iglesia ni Cristo o church of christ. Ganito ang kaniyang isinulat:


" 5. Si Jesucristo ba ay nagtatag ng Iglesia? Oo, mula sa lahat ng kasaysayan, kapuwa panlupa at hindi pangkabanalan, mula sa biblia na kinikilalang isang makataong kasulatan, ating nalaman na si Cristo ay nagtatag ng isang Iglesia, na mula sa kauna-unahang panahon ay tinawag na sunod sa Kaniyang pangalan, ang Iglesia Cristiana o ang Iglesia ni Cristo." [ Religion Doctrine and Pracrice, pp. 442-443]


Maging ang Prorestante na si Myer Pearlman ay nagpapatotoo rin na Iglesia ni Cristo ang itinatag ni Cristo. Tunghayan natin ang kaniyang sunulat:


"....hinulaan ni Cristo ang pagtatatag ng isang bagong kongregasyon o iglesia, isang institusyung sa Dios na dapat magpatuloy ng Kaniyang gawain sa mundo. Mat.16:18. Ito ang Iglesia ni Cristo...." [knowing the doctrines of the bible, p. 349]


Si James E. Talmage ng Mormon Church ay nagbigay rin ng patotoo na Iglesia ni Cristo ang wastong pangalan ng Iglesia na itinatag ni Cristo:


" Ipinagkaloob niya ang kapangyarihan sa Iglesia,ipinaliwanag niya ang kahalagahan ng pagtawag sa organisasyon sa pangalang marapat dito---Ang Iglesia ni Cristo...."[The Great Apostasy, p. 12]



Si John Hus na sinundan ng mga repormador ay nagpapatotoo rin na Iglesia ni Cristo ang itinatag ni Cristo:


" ' At sinasabi ko naman sa iyo, ikaw ay pedro, at sa ibabaw ng batong ito ay itatayo ko ang Aking Iglesia, at ang mga pintuan ng impiyerno ay hindi makapananaig laban sa kaniya. Ibibigay ko sa iyo ang mga susi ng kaharian ng langit, at anumang talian ninyo sa lupa ay tatalian sa langit at anumang kalagan ninyo sa lupa ay kakalagan sa langit' . Binabanggit ng Ebanghelyo rito ang tungkol sa Iglesia ni Cristo,ang kaniyang pananampalataya at ang kaniyang pundason at awtoridad. Ang Iglesia ay tinutukoy ng mga salitang,' itatayo ko ang aking iglesia' ." [Forerunners of the Reformation:The Shape of Lateb Medieval Thougt, p. 231]



IBA PANG KATAWAGAN SA IGLESIA

Itinatanong ng iba:

" Kung Iglesia ni Cristo ang pangalan ng tunay na iglesia, bakit sa Bagong Tipan ay may mababasa na IGLESIA NG MGA BANAL? "


Totoong sa Bagong Tipan ay may iba't ibang katawagang gamit upang tumutukoy sa Iglesia ni Cristo. Isa na rito ang "IGLESIA NG MGA BANAL" (1Cor.14:33). Subalit ang katawagang ito ay hindi siyang opisyal na pangalan ng Iglesiang itinatag ni Cristo, kundi, tumutukoy lamang ito sa uri ng mga kaanib nito :


1 Corinto 6:11
" At ganyan ang mga ilan sa inyo: nguni't nangahugasan na kayo, nguni't binanal na kayo, nguni't inaring-ganap na kayo sa pangalan ng Panginoong Jesucristo, at sa Espiritu ng ating Dios. "


Ang "Iglesia ng mga banal" ay katawagang tumutukoy sa uri o katangian ng mga kaanib sa Iglesia, sila ay binanal. Sila ay pinapaging banal kay Cristo (1Cor. 1:2) at tinawag upang mangagpakabanal (Roma 1:7). Sila ay pinili upang maging banal at walang dungis sa pagibig (efeso 1:4).


May mababasa rin sa Bagong Tipan na " IGLESIA NG MGA PANGANAY"( Heb.12:23).

Hindi rin ito tumutukoy sa pangkalahatang pangalan ng Iglesiang itinatag ni Cristo. Bagkus,ito ay tumutukoy sa mga judio na panganay o mga unang kaanib sa Iglesia na itinatag ni Cristo. Tinatawag din silang pangunahing bunga (Apoc.14:4). Kaya ang "Iglesia ng mga panganay" ay katawagang tumutukoy sa isang bahagi o lahi ng mga kaanib sa Iglesia---ang mga judio.


Mayroon ding mababasa sa Bagong Tipan na:


"Iglesia ng Galacia" (Gal.1:2)
" Iglesia ng Macredonia" (2Cor.8:1)
" Iglesia ng mga Gentil" (Roma 16:14)
" Iglesia ng Dios na nasa Corinto" (1Cor.1:2)
" Iglesia na nasa Antoquia" (Gawa 13:1)
" Iglesia na nasa Jerusalem" (Gawa 8:1)


At marami pang iba. Ang lahat ng ito ay tumutukoy hindi sa kabuuan ng Iglesiang itinatag ni Cristo, kundi sa mga lokal o mga dako na narating ng Iglesia ni Cristo sa panahon ng mga apostol. Sa katunayan, hindi angkop na tawaging " IGLESIA NG MGA GENTIL" Ang mga Judio na naging kaanb sa Iglesia. Gayundin naman, hindi angkop na ang Iglesia na nasa Jerusalem ay tawaging "Iglesia ng Macedonia" . Ngunit angkop na itawag sa mga kaanib sa Iglesia na itinatag ni Cristo saan man silang dako naroon ang pangalang Iglesia ni Cristo (Roma 16:16).



IGLESIA NG DIOS, ' CRISTIANO'

Sa bagong Tipan, lalo na sa mga sulat ni Apostol Pablo, maraming beses at ulit na tinawag ding "IGLESIA NG DIOS" ang iglesia na itinatag ni Cristo :

1Cor. 1:2; 11:12; 15:9; 2Cor. 1:1; Gal.1:13; 1Tim.3:5,15

Dapat mapansin na sa bawat pagkakataon na ginamit ni Apostol Pablo ang "Iglesia ng Dios", ito ay lagi niyang pinapatungkol sa mga Gentil na kaanib sa IGLESIA NI CRISTO. Ang tinatawag na na GENTIL ay hindi kabilang sa mga israelita at itinuturing na walang Diyos(Efe.2:12).

Dati ay hindi sila bayan ng Dios(Roma 9:24-25,MB) at hindi sila kumilala sa tunay na Dios (1Tes.4:5) sapagkat iniligaw sila ng mga piping Diosdiosan (1Cor.12:2).


Subalit ng sila ay maging kaanib sa Iglesia na itinatag ni Cristo, hindi na sila ibinibilang na TAGA IBANG BAYAN (Efe.2:19) sapagkat sila ay kinikilala na ng Dios bilang bayan Niya (Roma 9:24-25,MB). Samakatuwid, ang katawagang IGLESIA NG DIOS ay ginamit upang bigyang diin sa mga Gentil na umanib na sila ay sa Dios na.



Ang terminong "CRISTIANO" ay ginagamit din patungkol sa IGLESIA NI CRISTO". Ang unang pagkakataon na tinawag na Cristiano ang mga kaanib sa Iglesia ay noong makarating sa Antoquia (Gawa 11:26). Bagaman sa panahon ngayon ito ay ginagamit ng iba para tumukoy sa iba't ibang iglesia o samahang pangrelihiyon na nag-aangking sumampalataya sila kay Cristo, ang salitang "Cristiano" ay nagmula sa pangalang "Cristo" at angkop na ikapit sa mga taong sumusunod sa mga aral o salita ni Cristo [The Compact Dictionary of Doctrinal Words, p.56]



Walang alinlangan na ang pinakaugat ng salitang "Cristiano" ay ang pangalang "Cristo". Subalit dapat maunawaan na, hindi magiging angkop na tawaging Cristiano ang isang tao kung hindi siya kaanib Sa Iglesiang itinatag ni Cristo-Ang Iglesia ni Cristo. Maging ang mga awtoridad Katoliko ay ganito rin ang ipinahayag:



" Sinuman siya at anuman siya, siya na wala sa Iglesia ni Cristo ay hindi isang Cristiano."[ The Papal Encyclicals, p. 39]


" Hindi kita ibibilang na isang Cristiano malibang makita kita sa Iglesia ni Cristo." [ The Cinfession of St. Augustine, p. 117]


para sa karagdagang patotoo e click:


Maliwanag na ang pangalan ng tunay na Iglesia , ang Iglesia sa Bagong Tipan, ay Iglesia ni Cristo. Isa ito sa mga pagkakilanlan sa tunay na Iglesiang pag-aari at itinatag ni Cristo. At yayamang malaki ang kaugnayan ng pangalang ito sa kaligtasan, ito ang Iglesiang dapat na hanapin ng tao.

Isaias 41:8, Jacob o Israel ba ang tinutukoy?

Sinasabi ng mga sumasalungat sa pangangaral ng kapatid na Felix Manalo na ang tinutukoy ng hula sa Isaias 41:9-10 ay si Jacob o ang Israel. Kaya naman, sinipi nila ang talata sa unahan nito sa Isaias 41:8. Ganito ang nakasulat:



Isaias 41:8
" Nguni't ikaw, Israel, lingkod ko, Jacob na siyang aking pinili, na binhi ni Abraham na aking kaibigan "


Malinaw umano sa talatang ito na ang mga unang talata ay tumutukoy sa literal na Israel sa LAMAN.

Bakit natin natitiyak na ang tinutukoy ay hindi si Jacob na anak ni Isaac? Una, malaon nang patay si Jacob na anak ni Isaac nang isulat ni Isaias ang kaniyang aklat. Ikalawa, si Jacob ay hindi saklaw ng panahong tinawag na "wakas ng lupa".


KAYLAN ANG WAKAS NG LUPA?


Ito ay sa mga panahong malapit na ang Araw ng Paghuhukom. Nagbigay ang Panginoong Jesucristo ng mga tanda para matiyak natin kung ang panahon ay mga wakas na ng lupa. Kabilang sa mga palatandaang ito ay ang mga DIGMAANG AALINGAWNGAW SA BUONG MUNDO at kasasangkutan ng mga bansa at kaharian (Mat.24:6-7). Ang kinatuparan nito ay ang UNA AT IKALAWANG DIGMAANG PANDAIGDIG. Ang una ay sumiklab noong hulyo 27, 1914.

Tiniyak din na sa mga kaugnay na hula na ang sugong hinuhulaan ay magmumula sa Malayong Silangan (Isaias 43:5-6). Kaya kaalinsabay ng unang digmaang pandaigdig ay ang pagkarehistro ng Iglesia ni Cristo sa pamahalaan noon ding hulyo 27, 1914.

Dapat mauunawaan na may dalawang uri ng Israel ayon sa pagtuturo ng Biblia. Pansining mabuti ang sinabi ni Apostol Pablo:


Roma 9:6-8
" Datapuwa't hindi sa ang salita ng Dios ay nauwi sa wala. Sapagka't hindi ang lahat ng buhat sa Israel ay mga taga Israel:
Ni sapagka't sila'y binhi ni Abraham, ay mga anak na silang lahat: kundi, Kay Isaac tatawagin ang iyong binhi.
Sa makatuwid, ay hindi mga anak sa laman ang mga anak ng Dios: kundi ang mga ANAK SA PANGAKO'Y siyang ibibilang na isang binhi. "


Dito ay sinasabing may iba pang binhi ni Abraham buhat sa mga nagbuhat sa Israel: kung papaanong may Israel sa laman, mayroon ding Israel sa pangako. Bagaman hindi nagmula sa lahing Israelita, ibibilang din silang binhi ni Abraham sa pangako:


Galacia 3:29
" At kung kayo'y kay Cristo, kayo nga'y binhi ni Abraham, at mga tagapagmana ayon sa pangako. "


Binhi ni Abraham sa pangako ang mga taong kay Cristo-Ang kaanib sa Iglesia ni Cristo (Gal.1:22, New Pilipino Version; Mat.16:18). Kaya nga ang Iglesia ay tinawag ding Israel ng Dios:



Galacia 6:16
" At ang lahat na mangagsisilakad ayon sa alituntuning ito, kapayapaan at kaawaan nawa ang sumakanila, at sa Israel ng Dios. "

Hindi man Israel sa laman, ngunit Israel sa pangako. Kaya,bagaman ang hinuhulaan sa Isaias 41:9-10 ay hindi ang patriarkang si Jacob mismo, tiyak na ito ay tumutukoy naman sa Jacob o Israel sa Pangako-May kahalalang maglingkod sa Dios.


ANG PANGAKO NG DIOS SA KANIYANG SUGO


Isaias 41:14-15
" Huwag kang matakot, ikaw na uod na Jacob, at kayong mga tao ng Israel; aking tutulungan ka, sabi ng Panginoon, at ang iyong Manunubos ay ang Banal ng Israel.
" Narito, aking ginawa kang bagong kasangkapang panggiik na matalas na may mga ngipin; iyong gigiikin ang mga bundok, at didikdiking durog, at iyong gagawin ang mga burol na parang ipa. "



Sa mga talatang sinipi ay malinaw na ang hinuhulaan sa Isaias 41:9-10 ay pinangakuan ng Dios na Kaniyang tutulungan, palalakasin, hindi itatakwil, at ililigtas sa kaaway.


NATUPAD SA PANGANGARAL NG KAPATID NA FELIX MANALO



Ang pangako ng Dios na Kaniyang tutulungan at palalakasin ang gawain ng sugo na tinawag sa mga wakas ng lupa ay nagkaroon ng katuparan sa pangangaral ng Kapatid na Felix Y. Manalo.


Sa maikling panahon sa kabila ng paghahadlang ng maraming tumutuligsa at kumakaaway, ang Iglesia ni Cristo, sa tulong ng lakas na ipinangako ng Dios ay hinangaan ng marami dahil sa mabilis na paglaganap nito hindi lamang sa pilipinas kundi maging sa ibayong dagat. Sa tulong din na ipinangako ng Dios ay makikita ang mga naglalakihan at naggagandahang mga gusaling sambahan ng Iglesia ni Cristo sa iba't ibang panig ng mundo.


Nasaksihan ng marami kung papaano napapahiya at nalilito ang mga kumakaaway na nangahas makipagtunggali sa pamamagitan ng mga diskusyon. Nasaksihan din ng marami kung papaanong dinudurog ng mga salita ng Dios ang mga maling aral ng iba't ibang pangkatin ng pananampalataya na nagtangkang pasubalian ang mga aral ng Dios na ipinangaral ng Kapatid na Felix Manalo.


Nangyari ang lahat ng ito upang ating mauunawaan at sampalatayanan na ito ay gawain ng Dios:


Isaias 41:20
" Upang sila'y makakita at makaalam, at makagunita, at makatalos na magkakasama, na ginawa ito ng kamay ng Panginoon, at nilikha ng Banal ng Israel. "


At ang kapatid na Felix Manalo ang Kaniyang sugo sa mga WAKAS NG LUPA.

May Babala Bago Igawad Ang Hatol

Sa papalapit na araw ng paghuhukom at sa katapusan ng sanlibutan, ang mundo ay mas lalong nagpakasama at mas inuuna pa ang buhay na pansarili kaysa buhay na pangako. Kaya, ang mga kaanib sa loob ng Iglesia Ni Crito ay walang sawa sa paghihikayat sa tao upang madala sa tunay na gawain at paglilingkod.

Ang hatol ng Dios sa mga gumagawa ng masama ay hindi Niya kaagad iginagawad. Ito ang kahayagan ng malaking pag-ibig at pagpapahinuhod ng Dios upang ang tao ay mabigyan ng pagkakataong magbago at hindi mapahamak:


2 Pedro 3:9
" Hindi mapagpaliban ang Panginoon tungkol sa kaniyang pangako, na gaya ng pagpapalibang ipinalalagay ng iba; kundi mapagpahinuhod sa inyo, na hindi niya ibig na sinoman ay mapahamak, kundi ang lahat ay magsipagsisi. "



BABALA BAGO ANG BAHANG GUNAW


Ang isa sa mga kahayagan ng pagpapahinuhod ng Dios ay noong bago Niya gunawin ang unang sanglibutan ng baha:



1 Pedro 3:20
" Na nang unang panahon ay mga suwail, na ang pagpapahinuhod ng Dios, ay nanatili noong mga araw ni Noe, samantalang inihahanda ang daong, na sa loob nito'y kakaunti, sa makatuwid ay walong kaluluwa, ang nangaligtas sa pamamagitan ng tubig "



Ang bigat ng kasalanang ginawa ng tao sa panahon ni Noe (Gen.6:1-5,7) ay sapat nang dahilan upang igawad ng Dios ang kanyang parusa sa kanila. Ngunit hindi Niya ito ginawa kaagad, sa halip ay nagpahinuhod muna Siya at nagbigay ng pagkakataon upang ang mga tao ay magbago at ihindi mapahamak. Bilang katunayan, inutusan ng Dios si Noe na ipangaral ang matuwid na pamumuhay samantalang inihanda ang daong:




2 Pedro 2:5
" Dahil sa kasalanan ng tao noong unang panahon, ginunaw ng Diyos ang daigdig sa pamamagitan ng baha. Wala siyang iniligtas maliban kay Noe na nangaral tungkol sa matuwid na pamumuhay, at ang pito niyang kasama." [MBB]



Samantalang inihanda ni Noe ang daong, hindi niya inilihim sa mga tao na may malaking kapahamakan o paglipol na magaganap at ang daong ang tanging kaparaanan upang sila ay maligtas sa kapahamakang iyon. Gayunman, hindi sila naniwala sa ibinabala. Sa halip na tumugon, sila ay nagwawalang bahala. Hindi rin nila itinuwid ang kanilang buhay. Lahat ng nagwawalang bahala sa katotohanan ay napahamak. Walong tao lamang ang naligtas-si Noe at ang pito niyang kasama sa daong---dahil sa kanilang pakikinig sa babala ng Dios at pagtalima sa kanyang utos.



PAGLIPOL SA SODOMA AT GOMORRA


May isa pang pangyayari na inilalahad ang Biblia na ngapapatunay na bago igawad ng Dios ang hatol ay nagbibigay muna Siya ng pagkakataon upang ang tao ay hindi maparusahan. Ito ay ang pangyayari sa mga bayan ng Sodoma at Gomorra.

Dahil sa kanilang kasamaan, ang mga bayan ng Sodoma at Gomorra ay itinakdang wasakin ng Dios. Subalit sinabi ng Dios na hindi Niya itutuloy ang parusang inilalaan Niya kung mayroon man lang Siyang makikitang kahit sampung taong matuwid.(Gen. 18:16-32,MB). Samakatuwid, nagbigay ng malaking pagkakataon ang Dios sa mga bayang yaon. Ngunit dahil sa hindi man lamang umabot sa sampu ang matuwid sa Sodoma at Gomorra,itinuloy ng Dios ang Kaniyang parusa sa kanila.


Gayunman si Lot na isang taong matuwid, kasama ang kaniyang sambahayan, ay hindi idinamay ng Dios. Nag-utos ang Dios ng mga anghel upang iligtas sila mula sa kaparusahan (Gen.19:12-17).


Ano ang dapat maunawaan ng lahat sa ginawa ng Dios sa paglipol sa bayan ng Sodoma at Gomorra?


2 Pedro 2:6
" At pinarusahan niya ng pagkalipol ang mga bayan ng Sodoma at Gomorra na pinapaging abo, nang maging halimbawa sa mga magsisipamuhay na masama "


Ang paglipol na ginawa ng Dios sa Sodoma at Gomorra ay isang malinaw na katunayang paparusahan Niya ang mga taong masama. Ito ang dapat mauunawaan at makatawag-pansin sa mga nawiwili sa paggawa ng kalikuan. Ang pagpapahinihod ng Dios ang dapat umakay sa kanila upang magsisi. Hindi nila dapat ipagwalang bahala ang pagkakataong ibinigay ng Dios sapagkat magwawakas din ang Kaniyang pagpapahinuhod.

Bakit kahit ang Dios ay pag-ibig at mapahinuhod ay magwawakas ang pagkakataong Kaniyang ibinibigay sa mga taong masama kung hindi sila magbago? Ano ba ang kahulugan para sa Dios ng hindi pagtugon ng tao sa pagbabagong Kaniyang hinihingi?


Roma 2:4-5
" O hinahamak mo ang Diyos, sapagkat siya'y napakabuti, mapagpigil, at mapagpaumanhin? Hindi mo ba alam na binibigyan ka niya ng pagkakataong magsisi at magbagong-buhay kaya napakabuti niya sa iyo?
" Ngunit dahil da katigasan ng iyong ulo at di pagsisi, pinabigat mo ang parusang ipapataw sa iyo sa paghahayag ng poot ng Diyos sa Araw ng kaniyang paghatol. "( MB)



BABALA SA PANAHONG CRISTIANO


Kung paanong sa unang sanlibutan at sa mga bayan ng Sodoma at Gomorra ay nasumpungan ng Dios ang labis na kasamaan ng tao, gayon ang patuloy Niyang nakikita maging sa ating panahon:


2 Tim. 3:1-5
" Tandaan mo ito: mababatbat na kahirapan ang mga huling araw. Ang mga tao'y magiging makasarili,gahaman sa salapi, palalo, mayabang, mapang-alipusta, suwail sa magulang, walang utang na loob at lapastangan sa Diyos.
"Bukod dito, magiging malupit sila, walang habag, mapanirang-puri, mapusok, marahas, at mamumuhi sa mabuti.
"Hindi lamang iyan, sila'y magiging taksil, walang taros, palalo, at mahilig sa kalayawan sa halip na sa mga bagay na ukol sa Diyos. Sila'y mgkukunwang may pananampalataya ngunit hindi naman makikita sa buhay nila ang kapangyarihan nito. " (MB)



Tulad ng pinagpauna ng Biblia, sa mga huling araw na ito ay magiging labis ng kasamaan ng tao. Ang katotohanang ito ay malinaw na natupad. Katunayan, ang mga karumaldumal na kremin ay nagaganap sa ibat ibang panig ng daigdig. Kapansin-pansin ang lubhang pagsama at patuloy na paglala ng ugali ng tao sa kasalukuyan.

Subalit dapat nating tandaan na ang lahat ng masama at makasalanan ay walang bahagi sa kaharian ng Dios(1Cor.6:9-10). Bagkus, ang Dios ay nagtakda ng araw kung kailan Kaniyang ihahayag ang Kaniyang poot at parusa sa lahat ng taong masama:


2 Pedro 3:7, 10
" Nguni't ang sangkalangitan ngayon, at ang lupa, sa pamamagitan ng gayon ding salita ay iningatang talaga sa apoy, na itinataan sa araw ng paghuhukom at ng paglipol sa mga taong masama.
Datapuwa't darating ang araw ng Panginoon na gaya ng magnanakaw; na ang sangkalangitan sa araw na iyan ay mapaparam na kasabay ng malaking ugong, at ang mga bagay sa langit ay mapupugnaw sa matinding init, at ang lupa at ang mga gawang nasa lupa ay pawang masusunog. "


Itinakda ng Dios ang araw ng paghuhukom, ang paglipol sa lahat ng taong masama. Ang araw na ito ay darating na gaya ng magnanakaw. Sa araw na ito magwawakas ang pagpapahinuhod ng Dios sa lahat ng nagwawalang-bahala sa ibinigay Niyang pagkakataong magsisi at magbago. Kaya bago dumating ang araw na ito, kailangan maisagawa na tao ang kaukulang paghahanda upang hindi makasama sa mga lilipulin at paparusahan.



ANG PARAAN SA IKALILIGTAS



Ang Dios ay hindi kailan man nagkukulang sa pagpapaalaala at pagbibigay ng babala bago Niya isagawa ang PAGHUHUKOM. Sa pamamagitan ng Biblia ay itinuro Niya kung ano ang kailangan ng tao upang maligtas:


Roma 5:8-9
" Ngunit ipinadama ng Diyos ang Kaniyang pag-ibig sa atin nang mamatay si Cristo para sa atin noong tayo'y makasalanan pa. At ngayung napawalang-sala na tayo sa pamamagitan ng kaniyang dugo, lalo nang tiyak na maliligtas tayo sa poot ng Diyos sa pamamagitan niya." (MB)



Ang kailangan ay mapawalang sala ang tao sa pamamagitan ng dugo ni Cristo. Ito lamang ang tanging paraan upang makatiyak ang tao ng kaligtasan mula sa poot ng Dios. Ang napawalang sala o tinubos ng dugo ni Cristo na nakatitiyak ng kaligtasan ay ang Iglesia Ni Cristo:


Gawa 20:28
“Ingatan ninyo kung gayon ang inyong mga sarili at ang buong kawan na rito’y hinirang kayo ng Espiritu Santo upang maging mga katiwala, upang pakanin ang IGLESIA NI CRISTO na binili niya ng kaniyang dugo.” (lamsa trans.)


Sa panahong Cristiano, ang kailangan gawin ng tao upang mailigtas siya ng Panginoong Jesucristo sa kaparusahan sa araw ng paghuhukom ay ang pag anib sa Iglesiang tinubos ng dugo ni Cristo ang IGLESIA NI CRISTO.



Habang may pagkakataon pa, dapat samantalahin ng tao ang panahong ito na ibinigay ng Dios para sa kaniyang ikaliligtas, at hindi kung kailan hili na ang lahat

Apocalipsis 4:11 Si Cristo ba ang Dios?

Ang patuloy na pangangaral ng mga bulaang tagapangaral ay ang pagligaw sa maraming isipan at panananampalataya ng tao. Ang iilang talata na naman ay kanilang minamali sa pag-intindi upang madaya ang ilan sa maling aral lalo na sa pagka Diyos umano ng Panginoong Jesucristo. Isa na naman sa talata ang kanilang ginamit na nakasulat sa Apocalipsis 4:11. Ganito po ang nakasulat :



Apoc. 4:11
" Marapat ka, Oh Panginoon namin at Dios namin, na tumanggap ng kaluwalhatian at ng kapurihan at ng kapangyarihan: sapagka't nilikha mo ang lahat ng mga bagay at dahil sa iyong kalooban ay nangagsilitaw, at nangalikha. "


ang kanila lamang tiningnan rito ay ang bahagi lamang na "Tumanggap". Malinaw raw na ang Dios ay may tinanggap, gaya ng kapangyarihan,kaluwalhatian at kapurihan. Si Cristo raw talaga ito. Paano nila iniiugnay? Narito :



Apoc. 5:12
" Na nangagsasabi ng malakas na tinig, Karapatdapat ang Cordero na pinatay upang tumanggap ng kapangyarihan, at kayamanan, at karunungan, at kalakasan, at kapurihan, at kaluwalhatian, at pagpapala. "



Malinaw raw na si Cristo yung tinutukoy na Dios na tumanggap. Kita po ninyo kung paano makapanlinlang ang mga bulaang tagapangaral para lamang pangatwiran na Dios si Cristo, iniugnay ang dalawang talata.


Subalit, may dapat tayong mapansin. Ang kanila lamang tinindigan ay si Cristo ito, paano na ang mga naniniwala sa trinity, at naniniwala sa pagka Dios rin ng Ama, itsapuwera nalang rin pala sa kanila sapagkat talagang si Cristo nga raw yung tinutukoy sa Apoc. 4:11. Kita nyu ang kapalpakan ng aral nila. Ngunit, dahil sa ating pagnanais na malinawan ang maraming nagsusuri, ay atin itong lilinawin kung sino ba talaga ang Dios na tinutukoy sa nasabing talata.


Ayun sa nakasulat sa Apoc.4:11. Binanggit po na "NILIKHA MO ANG LAHAT NG BAGAY". Dito palang malinaw na talagang isa lang ang tinutukoy na lumikha sa pagkasabing "NILIKHA MO". . Siya lamang ang lumikha ng LAHAT NG BAGAY ayun sa talata. Ating tiyakin kung talagang sino ito. Ganito po ang paglilinaw :



Nehemias 9:6
" Ikaw ang Panginoon, ikaw lamang; ikaw ang lumikha ng langit, ng langit ng mga langit, pati ng lahat na natatanaw roon, ng lupa at ng lahat na bagay na nangaroon, ng mga dagat at ng lahat na nangaroon, at iyong pinamalaging lahat; at ang hukbo ng langit ay sumasamba sa iyo. "




Ang sabi ng Biblia, "Ikaw lamang ang Panginoon". Samakatuwid, tumutukoy lamang ito sa isang panginoon na kung saan Siya lamang ang lumikha ng lahat ng bagay. Ito ay walang iba kundi ang AMA :




Malakias 2:10
" Hindi ba iisa ang ating Ama? Hindi ba't iisang Diyos ang lumalang sa atin? Kung gayo'y bakit nagtataksil tayo sa isa't isa at nilalapastangan ang tipan ng ating mga ninuno? " [MBB]



Ang iisang Panginoon na lumikha ay ang Ama, Siya ang iisang Dios na lumikha. Ganito rin ang patotoo ng ibang talata :


Isaias 64:8
" Nguni't ngayon, Oh Panginoon, ikaw ay aming Ama; kami ang malagkit na putik, at ikaw ay magpapalyok sa amin; at kaming lahat ay gawa ng iyong kamay. "


Samakatuwid. Ang gumawa ng lahat na iisang Dios ay walang iba kundi ang AMA. Siya ang totoo binanggit at tinutukoy ayun sa talata ng APOC.4:11 kung saan pinagkamalan ng mga bulaang tagapangaral na si Cristo raw umano ang tinukoy sa talatang yan. At ang tinutukoy na Cordero ayun sa APOC. 5:12 ay ito si Cristo :



Juan 1:29
" Nang kinabukasan ay nakita ni Juan si Jesus na lumalapit sa kaniya, at sinabi, Narito, ang Cordero ng Dios, na nagaalis ng kasalanan ng sanglibutan! "


Siya ang Cordero ng Dios, at hindi ang "Cordero na Dios".


Ang Iglesia ni Cristo po ay sumasang-ayon na ang Panginoon Jesucristo ay binigyan ng kapamahalaan at kapangyarihan sapagkat ito ay totoong nakasulat sa Biblia (Mat.28:18; Efe.1:20-22). At ang nagkaloob sa Kaniya ay ang tunay na Dios. Subalit, ang Anak(Cristo) rin ay isusuko ang lahat doon sa nagkaloob at nagbigay sa Kaniya na walang iba kundi ang Dios (1Cor.15:26-28).


At ang totoo at tunay na Dios, makapangyarihan sa lahat(Gen.17:1) kaya totoo walang nagbigay sapagkat Siya na bago paman ang lahat (Awit 90:2),at walang Dios sa kanya na gumawa at yumari (Deut.32:39).


Ngayun. Bakit po ang sinabi ng parehong talata ng Apoc.4:11 ; 5:12 ay may binangit na ibinigay ang kapurihan,kapangyarihan,kaluwalhatian.? Ito po ay hindi tumutukoy na gaya ng pagbibigay ng Diyos ng diriktang pagkakaloob sa kaninumang pinagkalooban, kundi ito ay pagbabalik lamang ng kapurihan. .Na gaya ng pananalangin kung saan pagbibigay ng pagpupuri. At hindi sa pagkaloob ng Mismong kapangyarihan. At ito ay mababasa sa mga kasunod na talata :




Apoc. 5:13
" At ang bawa't bagay na nilalang na nasa langit, at nasa ibabaw ng lupa, at nasa ilalim ng lupa, at nasa ibabaw ng dagat, at lahat ng mga bagay na nasa mga ito, ay narinig kong nangagsasabi, Sa kaniya na nakaupo sa luklukan, at sa Cordero ay ang pagpapala, at kapurihan, at kaluwalhatian, at paghahari, magpakailan kailan man. "



Apoc. 1:6
" At ginawa tayong kaharian, mga saserdote sa kaniyang Dios at Ama; sumakaniya nawa ang kaluwalhatian at ang paghahari magpakailan kailan man. Siya nawa. "



At kung babalikan ang Talata na ating pinag-aral ay ganito ang ating matutunghayan :


Apoc. 4:11
“Aming Panginoon at Diyos! Karapat-dapat kang tumanggap ng papuri, karangalan, at kapangyarihan; sapagkat ikaw ang lumalang sa lahat ng bagay, at ayon sa iyong kagustuhan, sila'y nilalang mo at pinapanatili.” [MBB]



Apoc. 5:13
" At narinig kong umaawit ang mga nilikhang nasa langit, nasa lupa, nasa ilalim ng lupa at nasa dagat, lahat ng mga naroroon,

“Ibigay sa nakaupo sa trono, at sa Kordero, ang papuri at karangalan, kaluwalhatian at kapangyarihan, magpakailanman!” [MBB]


Tandaan po nating lahat, kahit kaylan ay hindi inangkin ni Cristo na Siya ang ating kikilalanin na Dios,bagkus pinabatid at pinakilala pa Niya bago Siya pumaroon sa langit upang makapiling ang Dios na dapat na ating kikilalanin. Ganito ang Kaniyang sinabi :


Juan 20:17
" Sinabi sa kaniya ni Jesus, Huwag mo akong hipuin; sapagka't hindi pa ako nakakaakyat sa Ama, nguni't pumaroon ka sa aking mga kapatid, at sabihin mo sa kanila, Aakyat ako sa AKING AMA at INYONG AMA, at AKING DIOS at INYONG DIOS. "


Ang sinabi po ni Cristo INYONG DIOS. . Ito ang Dios na kikilalanin ng Kaniyang mga alagad. .Kung saan Siya ang Dios na kinikilala ni Cristo. Napakalinaw po ng pahayag ni Cristo. Mahalaga na malaman ng tao na ang AMA lamang ang tunay at iisa na Dios sapagkat, ito ito ay sa ikapagtatamo ng buhay na walang hanggan :



Juan 17:3
" Ito ang buhay na walang hanggan: ang makilala ka nila, ang iisa at tunay na Diyos, at ang makilala si Jesu-Cristo na iyong isinugo." [MBB]



Kausap po ni Cristo ang Ama sa pagkakataong iyan, at kanyang ipinahayag ang tunay na kahalagan ang pagkilala sa tunay na Dios. Sapagkat, ito ang ikapagtatamo ng tunay na buhay.


Sana ay naging Malinaw po sa lahat, sa mga nagsusuri at patuloy na nagsusuri.